أخبار

(عشان انا اخترت اكل عيش حلال اتفتح راسي)..فتاة تحكي قصة تعرضها للضرب من قبل مجموعة أثناء عملها على بترينة أكل

السودان الجديد-فيسبوك تداولت مواقع التواصل الإجتماعي قصة مؤسفة لفتاة تعرضت للضرب من قبل مجموعة من الناس و هي تقوم بعرض مشروع الطعام الخاص بها على بترينة عرض.

 

و حكت: (بين الأمل والألم آسيا تعيش قصة

كنت مبسوطه شديد اني وأخيراً حاعمل شغل حقي واعمل فيه كل التفاصيل البحبها).

 

و أضافت:

(وبعد مجازفات اشتريت بترينا وكنت فرحانه بيها شديد مشيت الشعبي وصلحتها وكنت تعبانة بين الحدادين واجري المغلق كل شوية مرة ترباس ومرة مفصلات وبعد ١٠ يوم جري استلمت بترينا عمري بعد كدا باقي البوهية والإضاءة والشغلة بقت ماشة صعبة على شديد وحسيت بصعوبه الموضوع).

 

ثم تابعت:

 

(اشتريت البوهية وكنت مبسوطة ضربتها بوهية بيدي وفرحانة انو اول مره اضرب بوهية وكنت شايفه البترينا دي أعظم شي

عملت استيكر ولزقتو فيها وبقي منظرها حلو شديد لقيت الاضاءة عاوزة مبلغ كبير طوالي قلت بنشتغل باي شي المهم نبدأ

ورحلناها انتهت الاياااام الصعبة وايام الجري مع الحدادين

جانا السوق المركزي والشعبي

اشتريت مواد السفري اما المركزي قصة لاتحكي ابدا)

 

و اردفت:

 

(وجيت البيت مبسوطة بالرغم من التعب والسخانة وبديت اجهز اللحمة والصوصات وبالرغم من اني كنت تعبانه بس قلت اكيد حارتاح

مشيت انا واختي فتحنا وبدينا نجهز في الحاجات وختيت الكفتة في النار ومتحمسه للشغل واليوم الخميس واكيد حيكون في بيع كان حمااااس ما عااادي).

 

لتواصل:

(جاني عمو كبير السلام عليكم يا بتي وعليكم السلام يا عمو قال لي علي اي اساس نزلت حاجاتك قلت ليه انا جيت قبل اليوم مرتين سألت من الأرض وسألت الناس الشغاله واداوني اذن وكان معاهو بنات اتنين بتلفظو وبعينو لي من فوق لتحت ما أهتميت ليهم وكنت بتكلم مع عمو البت بدات تنبذني في زول بنزل ساي وبشتغل ساي ويا خالة وكلام فارغ قلت ليها احترمي نفسك لزت ابوها وشرطت لي ملابسي دخلت ركبت ركشة عشان استر نفسي كانت واقفه في الشارع

وانا بقيت مصدومة وفي نفس الوقت مستفزة من الحصل معااي لبست فنيلة ونزلت ليها مشيت عشان افهم ليه كدا كشحت موية باردة في وشي وانا قربت عليها واتلمو فيني اولاد وبنات تبعها ضربوني وجروني في ميدان كامل مليان ناس شلة ما اقل من ٢٠ نفر انا كنت في النص فقدت الوعي ولم مسكوني اولاد حلال كانو جمبي لقيت نفسي غرقانة دم واختي كانت بتكورك وانا كل جسمي دم جو الناس اتلمو وجات ست الشاي عملت لي بن عشان الدم يقيف وانا ما مستوعبة ولا فاهمة ليه كل دا الاستفزاز دا عدم الرحمة دي الألم دا كلو عشان انا عملت شنو عشان قررت اكل عيش حلال عشان اخترت اقيف اشتغل في الشارع عشان ذلة الناس ليه كل دا انا اسعفوني وما حاسه بي شي وانتهي بي المطاف انو راسي اتفتح بدون اقدم اذي لزول انو انا اتخيط راسي ٦ او ٧رغرز بدون اي شي

عشان انا اخترت اكل عيش حلال اتفتح راسي).

تعليقات الفيسبوك

تـابعـنا علـى واتـسـاب


اترك رد

زر الذهاب إلى الأعلى