شاب سوداني لصديقه بعد أن ساعده في بداية حياته: (صحبي لو كتبت أملاكي كلها بي إسمو ما بوفيهو حقو)

قام شاب سوداني بتأكيد مقولة أن الصداقة كنز عظيم و ذلك عبر استشارته التي شغلت مواقع التواصل و التي حوت سؤاله عن كيفية رد الجميل لصديقه الذي سانده و ساعده في بداية حياته الدراسية و العملية.

فكتب الشاب: (السلام عليكم ورحمة الله وبركاته ، إن شاء الله الإستشارة دي في خير ولله الحمد ، انا عمري 35 عندي صحبي أو بالأصح أخوي ودفعتي من الأساس لغاية الثانوي ، هو في الثانوي ما جاب نتيجة كويسة وانا جبت نسبة كبيرة دخلتني هندسة ، هو اصلا من زمن الأساس بشتغل في الإجازات وانا كنت زول اكاديمي بحت ،قال لي اسمع انت كمل قرايتك وانا داير إشتغل كفاني قراية بعد ده ، طبعا وضع الأسرة الزمن داك شوية صعب الوالد يا داب يلحق حق الاكل، ف قلت لي صحبي داير اشتغل معاك لكن هو رفض قال لي يا زول انت خش الجامعة وكمل قرايتك وابشر يا أخوي البتحتاج ليهو كلو انا جاهز بس انت ركز في دراستك).

و أضاف: (حرفيا صحبي دة ما قصر معاي في اي حاجة متعلقة بالجامعة من رسوم تسجيل لي شيتات حتى الملابس برضو الحمدلله ، لغاية ما إتخرجت بإمتياز الحمدلله إشتغلت سنتين هنا وبعدها سافرت الخليج بفضل الله لقيت منحة حضرت الماستر واشتغلت أستاذ في نفس الجامعة و شغال مهندس في شركة و ربنا فتحها علي وأسست لي شركة خاصة لله الحمد و وديت ابوي وامي الحج بفضل الله).

و أردف سائلاً:(يلا نجي للاستشارة صحبي يا ناس والله محتار أعمل ليهو شنو أنا لو كتبت أملاكي كلها بي إسمو ما بوفيهو حقو

عايز أعمل حاجة أرد ليهو بيها ولو 1 في المية من جميلو دة

ف عايزكم تشورو علي أعمل شنو).

و تفاعلت معه التعليقات بصورة جميلة مستبشرين بحفظه للود و صونه للعهد.

تعليقات الفيسبوك