استشارة صادمة..أب يترك 10 أبناء للحوجة بعد وفاة والدتهم و هو منعم في المال و ابنته تسأل:(أبوي بذلني و أمي ربتني حرة أبية ما عاوزة أتذل لزول أتعامل معاو كيف؟)
تركت استشارة صادمة لإحدى الفتيات أثرها على مرتادي موقع فيسبوك فأصابتهم بالحزن و أثارت الشفقة في قلوبهم.
حيث قامت الفتاة بنشرها على واحدة من الصفحات المعروفة و المعنية بنشر استشارات اجتماعية و عاطفية اعتاد فيها البعض عرض مشكلاتهم و ايجاد الحلول و ربما بعض الدعم من الجمهور المتابع و من خلال التعليقات.
و كتبت صاحبة الاستشارة مستهلة: (انا بنت عمري 23 سنة من فتحت عيني لقيت امي قدامي،كان في انفصال الوالد كان م عندو ذرة حنية علينا نحن ماشاء الله 10 اخوة لأم بنات واولاد انا كنت اقرب وحدة ليها ، املها كان في اخواني الاولاد يكبرو يساعدوها بس خاب الأمل كبرو واتزوجو م راعو لتعبها كان املها بعد يكبرو يساعدوها بس ياللأسف).
لتستمر في در عطف متابعي الصفحة قائلة: ( من كبرت وتميت ٨ سنين دخلت السوق معاها كانت بتسوقني معاها انا بس وصراحة كنت بزهج من الموضوع دا بقول نحن كم بت بس لية الا انا بعد نوصل مكان الشغل انا للان بتذكر كلامها كانت بتقول ليا شايفة فيك الحنية انتي ضراعي اليمين بتي الدكتورة ، واستمرينا كدا لفترة بمش المدرسة اغير ملابسي طوالي ع الشغل )
و أضافت (انا لما كنت ممتحنة الشهادة كنت بمش الشغل . عانينا معاناة م بعدها انا وامي كنا بنعمل راكبة الشغل بس قوتنا م كافية اقل هواء بيرميها واخواني الاولاد يجو مارين فينا من غير م يسلمو علينا حتى .مع الأيام امي الفيها كملت مرضت مرض شديد في يوم نص الليل صحتني وقالت ليا تعالي دايرة اديك امانات الناس انا وقتها جسدي واقف وروحي جاثية وصتني انا تاني عيني م رمشت والله مرات ٣ ايام انا عيني م بترمش بمش المدرسة م بستوعب شي بالي كلو متين اوصل البيت اشوف امي انا م عارفة اخواتي كانو بينومو بأي قلب ولا باي عين كيف امك بين الموت والحياة ويهنا ليك النوم . بعد كل المنى اقدر اساعدها بس بقيت اتمني يارب نموت في نفس الوقت لا تسمع بيا ولا اسمع بيها لاننا الاتنين م بنحمل فراق بعض).
و في لحظة مؤثرة قالت: (لحد جاء يوم والله ماتت وانا مرقداها في يدي …بعد ٣ شهور من وفاتها لقيت ابوي شفتو وابيت اسلم عليهو جاء لحقني ويسالني امك كيف ابيت اوريهو ورجعت البيت بعد فترة عرف وجانا ف البداية م قدرنا نتقبلو خالص تاني رخينا الفترة دي انا امتحنت وداخلة الجامعة).
و انتقلت الفتاة إلى الجزء من المشكلة و الذي تسبب للمتابعين بصدمة كبيرة: ( المشكلة ي جماعة كلها ف أبوي ماشاء الله وضعو فوق الممتاز عندو جنة الدنيا ع الارض . مرات بمشي ليهو وم بكون عندي قروش كافية بركب نص المسافة وبتم الباقي برجليني بوصل منهكة من التعب اول من اوصل بمد ليا يدو وبيكتفي ب كيفك ! بس .بعدها يبدا يزلني قومي نضفي لي وانا تعبانة بقوم بنضف وبغسل ليهو وبقول ليا اكوي ليهو بس يوم قلت ليهو م قادرة وفعلا كنت م قادرة لاني جاية من مسافة بعيدة يلا بدا يذلني).
و وصفت الفتاة: ( هو زول قامة ويلبس بدل واخر لبس اول شي يبدا ينتقد مظهري دي عباية ليك دا لبس ليك في حين انا الملابس دا اشتريتها بعرقي وم عندي استطاعة البس العايزاه يلا يبدا ليك فيني انا تعبت عشانك بعت عربيتي عشان اقريك ووالله رسوم الدراسة كانت 6 الف لا غير ع سمسترين بسمعني كلام لو اتقال للجبل يبقى تراب في حين انو م بيصرف علي .انا مرات بصلي العشاء مع المغرب عشان انوم وانسى الجوع وبصلي وانا قاعدة لاني من شدة الجوع بكون م قادرة اقيف).
و أردفت:( عديت فترة ع الحال دا لحد يوم مرضت شديد ومشيت ليهو برجف عندو عربية م كلف نفسو يوديني الدكتور . وقال ليا امشي المركز اسالي الفحص بكم وتعالي وانا والله تعبانة شديد م قادرة اجر نفس بقدرة ربنا مشيت امشي شوية واقعد شوية لحد وصلت وسالت رجعت قلت ليهو الفحص بالشي الفلاني قال ليا ارجعي اسألي من الدواء قلت من غير تطلع نتيحة الفحص كيف يعرفو دواي يلا قام فيني انتي اصلك وانا ربيتك وقريتك وبعت عربيتي عشانك زهجت خليت الفحص بقيت ف مشكلة قروش الرجعة لقيت سواق ود حلال قلت ليهو م عندي كتر خيرو م بنساها ليهو وصلني رجعت رتبت حياتي من جديد ونزلت شغل واشتريت ليا تلفون قلت اتواصل مع ابوي بس من بعيد لطالما القرب جايب كراهية بقيت اتصل عليهو بعد فترة حظرني رسلت ليهو رسالة اني عايزة انتحر رجع ليا قال والله م بهمني).
لتواصل مجددا :(عدت فترة اتخرجت ومسافة اتخرج من الجامعة مرة ابيع عباياتي ومرة شباشبي ومرة الطرح بس اتخرج فعلا اتخرجت بدعوات امي من احد المجالات الطبية وياداب نزلت شغل وم بلقى حق المواصلات حتى عشان اوصل الشغل وابوي راقد ف القروش عايش اخر رفاهية . وبحب يذلني ووالله عديل بقول ليا انا بكرهك لو اتصلت عليهو بقفل ف وشي ويحظرني ولو مشيت ليهو يعمل فيها نايم لو قمت اتحركت خطوة يطلع بالدس).
ثم و في غاية الحزن سألت:( انا والله تعبت امي تعبت ربتني حرة ابية م عايزة اتذل لزول اتعامل معاهو كيف !!!!! اذا القران بقول ( وصاحبهما في الدنيا معروفا ) اي بالبر والصلة وهو م عايز الصلة انا اعمل شنو).
لتأتيها ردود المتابعين مواسية و منهم من استبشر لها بالخير جزاء الصبر.