محمد عبدالماجد

محمد عبدالماجد : (الرئيس المناوب) في المريخ بدون صلاحيات (لا بهش ولا بنش) لا بمضى لا ببصم

صابنها

محمد عبد الماجد

(الرئيس المناوب) في المريخ بدون صلاحيات (لا بهش ولا بنش) لا بمضى لا ببصم

· في هذه المساحة قلنا لكم ان الاخ محمد سيد احمد الشهير بـ (الجاكومي) بعد ان اعلن الحرب على الهلال ما بكسب خير – على الاقل في مجال العمل العام…ما دون ذلك ما عندنا مشكلة معاه .

· الجاكومي بعد ان اعلن الحرب على الهلال تعالوا شوفوا ماذا حصل له؟

· اول حاجة موضوع صيانة استاد المريخ بواسطة شركات الدعم السريع تم رفضه من قبل جماهير المريخ نفسها.

· الموضوع انكشف.

· عاوزين تحققوا (مآربكم) السياسية عن طريق نادي المريخ.

· جماهير المريخ في موقف وطني كبير يحسب لها ترّست الطريق على شركة الجنيد المعنية بصيانة الاستاد ومنعت دخول عمالها وجراراتها لملعب المريخ.

· انكشف امر الجاكومي واتضحت علاقته بالدعم السريع لذلك وجد هجوم كبير من اعلام المريخ ومن جماهير المريخ ايضا.

· يعني الحرب التى هدد الجاكومي بإعلانها على الهلال انقلبت عليه … وإصابته لعنة الهلال من اعلام وجماهير المريخ.

· الجاكومي الذي قال انه سوف يدخل في حرب مع الهلال هو الآن في حرب مع اعلام ناديه وجماهيره.

· الهلال سرو باتع.

· انت يا الجاكومي فاكر الهلال فاضي عشان يدخل في حرب معاك.

· الهلال يحدد حروباته وحده ..لا تحدد انت مجرد شخص عادي للهلال حروباته ..يعرف الهلال متى يدخل في حرب؟ ولا ينزل الهلال الى درجة يضع فيها الجاكومي ندا للهلال.

· الموضوع دا ما بالساهل كدا.

· الجاكومي اصغر من ان يكون خصما للهلال.

· والهلال ما فاضي ليه.

· لذلك اعلام المريخ وجمهوره تولى امر محمد سيد احمد حاربه بصورة قوية وفظيعة في نفس الوقت.

· اين الجاكومي الآن؟

· الجاكومي انحسر زي النيل الحصاحيصا.

· الزول دا لا في كيان الشمال ظاهر.

· ولا في الجبهة الثورية.

· ولا في مجموعة الميثاق في الحرية والتغيير.

· ولا في المريخ ذاتو.

· زولكم في مريخو اختفى.

· بقى لا لايف لا بوست.

· حتى (العسكر) الذين يدعمهم الجاكومي ويتغزل في قياداتهم كما فعل مع حميدتي اصبحوا لا يهتمون به.

· كرت محروق.

· الحرب على الجاكومي لم تكن فقط من من اهل المريخ – ليس هي فقط من جماهيره وإعلامه … وإنما كانت ايضا من مجلس المريخ.

· الجاكومي الذي كان يطلق على نفسه (الرئيس المناوب) في مجلسه حاربوه.

· حجّموه.

· وقلصوا صلاحياته.

· وخلوه قاعد ساكت ..كأنو في الجبهة الثورية.

· مجلس المريخ وعبر خطاب صادر من رئيس النادي حازم مصطفى محمد ابراهيم كما جاء في الخطاب المرسل الى الامين العام للاتحاد العام قام بإلغاء تفويض محمد سيد احمد سرالختم ( الجاكومي) ومهند كمال محمد نور ومنح صلاحية الامضاء والتوقيع على القرارات والمخاطبات الرسمية للنادي للأستاذ بدرالدين عبدالله النور واللواء الدكتور محمد آدم النقي.

· بهذا القرار وذلك التفويض اصبح محمد سيد احمد الجاكومي قاعد ساكت.

· الجاكومي (الرئيس المناوب) صلاحيته اصبحت لا تتجاوز حدود الاعضاء منير نبيل وتابيتا بطرس.

· بطرس من زمن الكيزان كانت تمومة جرتق.

· ما اكتر من كدا.

· تاني المساحة التى يمكن ان يتحرك فيها الجاكومي لا تتجاوز مساحة الطلوع في (لايف) على منصات التواصل الاجتماعي.

· بس كدا.

· شفتوا الحرب على الهلال نتيجتها شنو؟

· زول يحاربوه اهلو ..ويقعدوه في محلو ..الهلال يدخل في حرب معاه على شنو؟

· ماذا تبقى من الجاكومي عشان يحاربوه؟

· انت فاكر المريخ دا (الجبهة الثورية)؟ عشان تتصارعوا فيها حول (الكراسي).

· انت فاكر الهلال دا ميثاقكم الوطني المبيني على خيانة الحرية والتغيير والمكون المدني.

· الهلال اكبر من كيان الشمال.

· الهلال وطن.

· الهلال شعب.

· وحركة وطنية.

· عشان كدا أي زول يضمر شر للهلال ما بكسب خير.

· الجاكومي طبعا وقت اترشح مع حازم لمجلس المريخ كانت كل امكانياته تتمثل في (لسانه الطويل).

· هذه هي مؤهلاته.

· قال ليهم انتوا ادفعوا وأنا بشاكل ليكم.

· ناس حازم يدفعوا في القروش والجاكومي يتفرغ ليكم للحرب مع الهلال.

· حكاية (اللسان الطويل) دا بقت ما بتخوف ليها زول.

· أي زول في الزمن دا بقى لسانو طويل ..وعندو صفحة وبكتب وممكن يطلع في (لايف).

· الموضوع ما عاوز ليه مواهب ولا مؤهلات.

· الجاكومي عاوز يبقى (الرئيس المناوب) بالحرب مع الهلال.

· كل ما يريد ان يقدمه للمريخ هو ان يحارب الهلال.

· يشتم ناس الهلال ويعمل ليهم فيها (بطل) في المريخ زي ما بعمل في الجبهة الثورية.

· زي ما بحصل في كيان الشمال …عامل ليهم فيها حريص على حقوقهم.

· تتخيلوا حقوق كيان الشمال عاوز الجاكومي يرجعها عن طريق صلاح قوش.

· الجاكومي مجموعة من التناقضات.

· الجاكومي في الحرية والتغيير ومع (العسكر).

· الجاكومي في الجبهة الثورية ومع صلاح قوش.

· الجاكومي في كيان الشمال وضد المكون المدني.

· الحاجات دي ممكن تبقى كلها في وقت واحد.

· طبعا الجاكومي عندما تغزل في حميدتي واثنى على صلاح قوش جعله (مناضل) لم استغرب بعدها عندما اعلن الحرب على الهلال.

· زول يتفق مع (الدعم السريع) من الطبيعي ان يكون في حرب مع الهلال.

· مع ذلك الهلال لا يدخل في حروب صغيرة بهذا الوزن.

· هلال الوطنية ما فاضي للحاجات دي.

· ولا بيكبّر ليه شخص ويصنع منه بطل لأنه فقط يحارب في الكبير الهلال.

· الجاكومي دا اهلو في المريخ كفيلين بيه.

· الطريف ان الجاكومي اعلن الحرب على الهلال ممثل في لجنة تطبيع الهلال بقيادة السوباط ويونس والعليقي …في الوقت الذي اثنى فيه على صلاح ادريس والكاردينال.

· انت لو عاوز تحارب الهلال ما تستثنى زول.

· ناس صلاح ادريس والكاردينال اذا الامر مس الهلال هم اول من سوف يتصد لك ..عشان كدا ما تحاول تجعلهم في موقف حياد.

· لا حياد مع الهلال.

· الهلال بس.

· عاوز تحارب الهلال وتتفق مع صلاح ادريس والكاردينال ابناء نادي الهلال.

· دا كلام شنو؟

· بعدين اذا اعلام المريخ وجمهوره وأعضاء مجلسك وأنت (الرئيس المناوب) كما تقول ما استحملوك وأوقفوك في حدك تعتقد ان صلاح ادريس والكاردينال يمكن ان يسكتوا لك.

· إلّا الهلال – هكذا يقول الاستاذ صلاح مليشيا وهكذا يكتب.

· قبل ذلك كان ابناء عمومة محمد سيد احمد قد ابعدوه من الاتحاد العام وقت عمل ليكم مشاكل ، ودخل معهم بعد ذلك في مشاكل.

· عمل الجاكومي مشاكل في الحصاحيصا مع اندية المنطقة وأبعدوه من رئاسة اتحاد الحصاحيصا (شالوه اهلو) وعمل مشاكل في الشرق مع الادروبات (احلي ناس) ..ولم يجد الاتحاد العام بقيادة قريبه معتصم جعفر إلّا ان يبعد محمد سيد احمد من أي منصب في الاتحاد العام.

· وناس الجبهة الثورية فعلوا نفس الشيء.

· وهكذا فعلوا جماعة الميثاق.

· ولم يحتمل المريخاب الجاكومي وهو في مجلس ادارة المريخ (الرئيس المناوب) كما يطلق على نفسه.

· …..

متاريس

· نسبة لظروف الكهرباء ..نكتب قبل مباراة الهلال والامل.

· وما عارفين التسجيلات في اخر ليلة بقى عليها شنو؟

· بكرة نرجع ونكتب عن المباراة ان شاءالله وعن التسجيلات.

· ان شاءالله الهلال يكون حقق الانتصار على الامل.

· وان شاءالله التسجيلات تكون اكتملت على خير.

· بكرة نشوف مشاطيب المريخ.

· ونشوف المعلقين.

· اصبروا انتوا بس.

· ما في حاجة بتروح.

· (وقعت شركة بلو سبورتس الراعية للدوري الممتاز عقداً مع الهيئة العامة للإذاعة و التلفزيون لنقل مباريات الدوري. جاء ذلك خلال مؤتمر صحفي بحضور رئيس الاتحاد العام لكرة القدم و ممثلي الشركة و الهيئة. و أكد ممثلي التلفزيون أن نقل الدوري سيتم بثمانية مباريات على أن يبدأ البث رسمياً مع انطلاقة الدورة الثانية في وقت أكدوا فيه نقل مباراة القمة في الرابع عشر من مايو القادم. و أرجع رئيس الاتحاد ؛ معتصم جعفر تأخر توقيع عقد البث لمزيد من التجويد مبيناً أنهم يريدون نقل الدوري بطريقة محترمة للمساهمة في تسويق اللاعب السوداني خارجياً).

· دا خبر التوقيع.

· الناس ديل ما عندهم رأس.

· امامكم مباريات الهلال والمريخ مجمعة في الوقت الحالي في بورتسودان وفي الابيض ..البخليكم تنتظروا الدورة الثانية شنو؟

· انا (بلادة) زي دي عمري ما قابلتني.

· هذه الايام كل الجماهير تترقب مباريات الهلال والمريخ …كان يمكن تعملوا حدث.

· خاصة ان المباريات سوف يكون الهلال والمريخ طرف دائم فيها ..كما انها تلعب في مناطق محددة وفي فترة محدودة.

· ناس التلفزيون القومي اذا كان هذا هو تخطيطهم …اقنعوا من خير منهم.

· نحن في كل يوم بنقول يا حليل شداد.

· الدوري بقينا نتابعوا في السر.

· والله يا ناس الاتحاد العام هذا (العبث) و (الفوضى) ما بنفوتوا ليكم.

· أي حاجة بوقتها.

· والحسابة بتحسب.

· اصبروا بس.

· ….

· ترس اخير : بكرة يوم احلي ان شاءالله.

تعليقات الفيسبوك

تـابعـنا علـى واتـسـاب


اترك رد

زر الذهاب إلى الأعلى